ដោយ :  បន្ទាយ

បន្ទាយមានជ័យ : ស្ថានទូតចិន អះអាងថា នឹងធ្វើជាស្ពានភ្ជាប់ទំនាក់ទំនងនិងសម្ព័ន្ធមេត្រីភាពរវាងខេត្តយូណានប្រទេសចិននិងខេត្តបន្ទាយមានជ័យ ប្រទេសកម្ពុជាឲ្យបង្កើតនិងពង្រឹងចំណងមេត្រីភាពឡើងវិញ។ នេះបើតាមជំនួបសម្តែងការគួរសមនិងពិភាក្សាការងាររវាងរដ្ឋបាលខេត្តបន្ទាយមានជ័យនិងឯកអគ្គរដ្ឋទូតចិនប្រចាំកម្ពុជា។

លោកអ៊ុំ រាត្រី អភិបាលខេត្តបន្ទាយមានជ័យបានស្វាគមន៍និងបានរាយការណ៍ពីស្ថានភាពទូទៅ សក្តានុពលខេត្ត ហើយបានរំលឹកថា ខេត្តបន្ទាយមានជ័យនិងខេត្តយូណានធ្លាប់ជាខេត្តមេត្រីភាពនឹងគ្នាតាមរយ:ការចុះអនុស្សណ:យោគយល់គ្នា(MoU) លើកទី១ ទី២ រយ:ពេល៥ឆ្នាំ ពីរដង។  ភាគីមន្ទីរកសិកម្មខេត្តយូណានបានជួយកសាងឧទ្យានគំរូ បច្ចេកទេសកសិកម្មមិត្តភាពខេត្តយូណាន -បន្ទាយមានជ័យនៅឃុំទួលពង្រស្រុកម៉ាឡៃ អស់ទឹកប្រាក់៣លានដុល្លាសរអា  បានជួយកសាងអគារសិក្សានៅស្រុកព្រះនេត្រព្រះ  បានផ្តល់ជំនួយផ្សេងទៀត និងផ្តល់អាហារូបករណ៍ដល់និស្សិតកម្ពុជាចំនួន២នាក់ រាល់ៗឆ្នាំឲ្យទៅសិក្សានៅសាកលវិទ្យាល័យនាខេត្តយូណាន ព្រមទាំងការផ្លាស់ប្តូរប្រតិភូទៅមកធ្វើទស្សកិច្ច។

ប៉ុន្តែតាំងពីអំឡុងវិបត្តិសាកលនៃការឆ្លងរីករាលដាលជំងឺកូវីដ១៩ កន្លងមក គម្រោងឧទ្យានបានផ្អាក ។ ឯកិច្ចសហប្រតិបត្តិការរវាងខេត្ត ក៏ថយចុះសកម្មភាពដែរ ។ហេតុនេះ ស្នើសុំស្ថានទូតជួយជម្រុញឲ្យដំណើរការឡើងវិញ។

លោកអ៊ុ រាត្រី បានបន្តថា: ខេត្តបន្ទាយមានជ័យជាខេត្តកសិកម្ម ប៉ុន្តែមិនទាន់មានវិនិយោគិនបរទេសមករកស៊ីច្រើនវិស័យនេះ។ រីឯតំបន់សេដ្ឋកិច្ចពិសេស ក្នុងខេត្តមាន៤កន្លែង ។

ប៉ុន្តែក្រុមហ៊ុន រោងចក្រនិងតំបន់សេដ្ឋកិច្ចពិសេសមានតែជនជាតិផ្សេងៗ  មិនមានជនជាតិចិននៅឡើយ ។ ជនជាតិចិនមានច្រើននៅក្រុងប៉ោយប៉ែត ដែលមកប្រកបរបររកស៊ីទ្រង់ទ្រាយជាសេវាកម្សាន្ត និងផ្នែកនានា  ហាងលក់ដូរទំនិញ  ភោជនីយដ្ឋាន…ជាដើមនិងជាភ្ញៀវទេសចរ។

ទោះជាយ៉ាងណា ក៏មានក្រុមហ៊ុនចិនចំនួន២ បានមកធ្វើអាជីវកម្មស្រាវជ្រាវ រុករករ៉ែមាសនៅស្រុកភ្នំស្រុក និងដាំដំណាំដំឡូងមីស្រុកថ្មពួកដែរ ។

ហេតុនេះ ខេត្តស្នើសុំស្ថានទូតចិនជួយទាក់ទង ទាក់ទាញវិនិយោគិនចិនមកបណ្តាក់ទុនរកស៊ីនៅក្នុងខេត្ត។

លោកអភិបាលខេត្តស្នើសុំលោកទូតជួយសុំអន្តរាគមន៍ដើម្បីបានគ្រូស្ម័គ្រចិត្តជនជាតិចិនមកជួយបង្រៀននៅសាលារៀនខ្មែរ ចិននៃសមាគមខ្មែរ ចិន ក្រុងប៉ោយប៉ែត និងអគុណដែនទូតជួយសម្របសម្រួលឲ្យមានគ្រូស្ម័គ្រចិត្តជនជាតិចិនមកជួយបង្រៀនភាសាចិននៅសាកលវិទ្យាល័យជាតិមានជ័យ ,នៅសាលារៀនផីឆឹងនិងនៅសាលារៀនចុងវ៉ា ។

នាឱកាសនោះ  លោកអភិបាលខេត្តក៏បានថ្លែងអំណរគុណដល់រដ្ឋាភិបាលចិនដែលបានផ្តល់កម្ចីសម្បទានសម្រាប់ស្ថាបនាផ្លូវជាតិលេខ៥៩ ផ្លវជាតិលេខ៥៨។ផ្តល់ជំនួយឥតសំណងស្ថាបនាផ្លូវខេត្តលេខ៥៨ដេ(គុត្តសត-អូរបីជាន់។ផ្តល់រថយន្តគិលានសង្គ្រោះ រថយន្តក្រុងសម្រាប់ព្យាបាលចល័ត ,ជួយវ៉ាក់សាំង សម្ភារ ថ្នាំពេទ្យនិងម៉ាសក្នុងអំឡុងវិបត្តិសាកលនៃការឆ្លងរាលដាលជម្ងឺកូវីដ១៩ ។ ស្ថានកុងស៊ុលចិននៅខេត្តសៀមរាបបានជួយម៉ាស៊ីនកុំព្យួទ័រ ថេបប្លែត និងថ្មីៗនេះ ស្ថានទូតចិនប្រចាំកម្ពុជា បានជួយស្ថាបនាស្ពានបេតុង១កន្លែងនៅឃុំសឿ។

លោកវ៉ាង វិនពិន (Wang Wenbin) ទូតចិនបានថ្លែងថា: លោកនឹងធ្វើជាស្ពាន ដើម្បីឲ្យខេត្តយូណាននិងខេត្តបន្ទាយមានជ័យភ្ជាប់មេត្រីភាពចាស់បានចុះMoU ឡើងវិញ និងស្នើឲ្យមន្ទីរកសិកម្មខេត្តយូណានចុះMoUជាមួយមន្ទីរកសិកម្មខេត្តបន្ទាយមានជ័យឡើងវិញដែរដើម្បីដំណើរការឧទ្យានគំរូ បច្ចេកទេសកសិកម្មមិត្តភាពខេត្តយូណាន -បន្ទាយមានជ័យឡើងវិញ ។ ស្ថានទូតក៏នឹងជួយកៀរគរ ជំរុញអ្នកវិនិយោគិនចិនមករកស៊ីនៅខេត្តនេះ ផងដែរ ហើយក៏សម្របសម្រួលជាមួយការិយាល័យកូនចៅ ចិននិងក្រសួងអប់រំ និងវិទ្យាសាស្ត្រចិនដើម្បីបញ្ជូនគ្រូស្ម័គ្រចិត្តមកជួយបង្រៀនភាសាចិននៅក្រុងប៉ោយប៉ែត ។

ភាគីទាំងពីក៏បានសន្យាសហប្រតិបត្តិការទប់ស្កាត់ឧក្រិដ្ឋកម្ម ការឆបោកតាមប្រព័ន្ធទូរគមនាគមន៍(Online) ឧក្រិដ្ឋកម្មឆ្លងដែន ការការពារសន្តិសុខ សុវត្ថិភាពជនបរទេសផងដែរ ៕